من الأخر

من الأخر

النظام مش هو الكام حرامى اللى فوق..النظام الفاسد عرف يوصل الفساد لكل الشعب..يعنى لما

نقول نسقط النظام يبقى نولع فى الشعب..النظام كان كاسر عين الشعب 30 سنه بس مش بأمن

الدوله ولا العنف..بس أبويا لما يزوغ من الشغل بدرى عشان يلحق قبل زحمه المواصلات ولما يزوغ

فى وسط اليوم عشان يقضى مصالحه ولما يضرب شهاده مرضى عشان يروح يصيف أوعى تفتكر

أن النظام مكنش عارف أن ده بيحصل..لما الموظف كان بيعمل كده كان الأول ضميره بيأنبه لكن

شويه بشويه أبتدى ضميره ينام وبعدين مات,,النظام عرف يموت ضمير الشعب كله بأنه يخليه

مضطر يعمل حاجه غلط بشرط أنه يسكت على الفساد.لما أختنا اتعرت فى ميدان التحرير فى ناس

قالت تستاهل وايه اللى وداها هناك واحنا استغربنا وقلنا الناس دى ضميرها فين,,الناس دى لو

ضميرها صاحى كانوا هيعرفوا أن أول حد المفروض يتحاكم على الفساد هم مش حسنى وشلته ..

حسنى عرف يلعبها صح ويشتغل بمبدأ عديلى وأعديلك..أجبرهم بذكاءه أنهم يغلطوا كتير وعشان

يستحملوا يعيشوا بالغلطات دى كان لازم يخدروا ضميرهم وده اللى أحنا بنلاحظه دلوقتى فى

كلمات زى "" أيه اللى وداهم هناك..لابسه عبايه على اللحم..دول حشاشين..أحنا مطلبناش من

حد يجيب حقنا أحنا راضيين كده" و حاجه زى أنتخاب شفيق..النظام من أيام عبد الناصر بوظ جيل

كامل ألا من رحم ربى..واللى كان مخلص فى شغله ومش بيدفع رشاوى فى كل حاجه هتلاقيه

مؤيد للثوره جدا لأن ضميره لسه صاحى..لازم الجيل ده كله يخلص عشان نبتدى على


نضافه..خلاصه الموضوع



مع مراعاة ان الموضوع احداثه قديمه لانه مكتوب من بدرى بس المبادئ واحده


كتبه : سامح عيسوى

لكل بنت بتسمع كلمه "قطر الجواز هيفوتك"

يعنى أيه قطر الجواز فاتها؟
يعنى تتشعبط فى قطر بضايع بدل ماتسافر فى رحله حياتها فى درجه أولى مكيف؟
سنها وصل 30 ومش راضيه تقبل اى عريس تبقى بنت كلب وتستاهل الدبح
عشان مش عاوزه جواز الصالونات الفاشل بكل المقايس يبقى بترفض النعمه؟
يعنى ايه جواز صالونات
يعنى اروح اشوف بنت لو طلعت شكلها حلو او غلبانه على قد فلوسى يبقى اشيل؟
يعنى ابقى معفن ومقفش واروح على انضف بنت فى الدنيا واقول ما البنات كتير وهم مش لاقيين
رساله بجد لكل بنت
عيشى بكرامتك احسن ما تعيشى مع واحد انتى متعرفهوش لمجرد انك تكونى مكنه تفريخ عشان تحافظى على السلاله
انتى محتاجه حضن راجل يحميكى وتحسى فيه بالأمان..بس الجواز الأهبل ده مش هيوفر ليكى الحضن ده مجرد انك هتخلصى من كلام الناس "او ده اللى انتى فاكراه"
انتى بترمى نفسك فى النار واوعى تصدقى حد يقولك ماهو فلانه متجوزه كده وعايشه زى الفل دى عالم كدابه
كل الناس حواليكى عمالين يزنوا على ودنك عشان تخلصى وتتجوزى..انت بالنسبه ليهم مجرد حيوانه لو ملقتيش الجنس فى سن معين هتمشى على حل شعرك..اه بجد
اى شاب معفن يروح يتقدم لواحده محترمه وكويسه على اساس انها مش لاقيه يبقى ابن كلب
واى حد يضايق بنت بكلامه لمجرد انها اختارت تعيش حياتها بمزاجها يبقى ابن كلب
واى حد يقول للبنت قطر الجواز هيفوتك يبقى ابن ستين كلب
ماهو انتى مش عشان تلحقى القطر ترمى نفسك تحت العجل
انتى انسان ليكى ارادتك عيشى زى مانتى عاوزه
انا عارف ان الكلام مش مترتب بس انا مخنوق جدا من الموضوع ده ونفسى اقول الكلام ده من بدرى

سيبوا البنات المحترمه المثقفه فى حالها يا ولاد ال.........

كلمات قصيدة انا مش فارس الأحلام..للرائع عمرو قطامش

انا مش فارس الاحلام ولا الجندى اللى مات قدام

ووسط الحرب لو تقعى انا مش بطلك المقدام

انا سرطانك الخالد بريئك اللى خد اعدام

انا سرطانك الخالد حبيبك اللى خد اعدام

انا عاشق مبيطولشى ولوطالك ما راح يسلم

انا نعسان مابينامشى ولوحاول يخاف يحلم

انا اللا منطق العادى كما قالوا انا فى وادى و كل الخلق فى وادى

انا البطل اللى ماشيلك بضهره كانى روحت مش راجع

انا ضحكه عجوز لاسع سمع اثناء ما بيصلى غنا و مزيكا فى الجامع

انا الوردة اللى بتشوه جمال صورتك انا الواد اللى بيخونك

وبيحافظ على غيرتك

انا الحرب اللى بتجمع و بتداوى وبتفرق و بتفرتك اقولك كلمتين حلوين

واخد عمر من عمرك اشوف الحزن فى عنيكى اغمى عينيا و اتلكك

انا الدمعه اللى مش قابله عليكى تهون انا المحبط ولو احبط اسلم نفسى قبل ما اخون

اكون راجلك و مش عارف ابوس ايديك فاحاول اكون ولو عايزه سبب للخزى

اديكى ميتين ميليون

انا المنطق بتاع ارحل بتاع امشى ولما بخاف من العسكر بوافقهم على وجودهم وفى نظرى بكون ملعون

موافق مره احكيلك عليا باختصار يمكن تبادلينى كما ما عندى من مكنون

انا كداب مليش اصحاب انا عايش فى خرم الباب

واموت من الخوف لو الشارع فى يوم اتساب

فدمعلك و ارجعلم خطاباتك وامشيلك و ارجعللك واشكيلك و اسمعلك

واطلعلك لسان الحق يلطعلك كلام يوجعنى فى جسمك

ما انا جسمك

وانا الحرف اللى هجر اسمك وانا اللون اللى ساح فى اللوحه بوظ شكل نهر النيل

وراح يلقالوا حل بديل ولما صرح وقال يارحيل

ما كان يعرف بان الكون هيقلب ليل وملك الغابه راح يزئر وهيدمر و هيعور

وهيدور على المساكين و يمنحهم عشا الضاللين ويجبرهم فيدعولوا ويجبرنى فاقول امين

وتوهنا خلاص وراضونا بدى توها وغنولنا اغانى العيد ووسط الغنوه فزعونا فى بورسعيد

فهدونا وهدونا خلاص انسوا ده حلم وحش فنمنا هوووو نمنا هوووو

انا عايز و مش جايز اعوز تانى وخايف العوزه تنسانى فاحاول اعوز

لأول مره اصدر حكم على السلطان اقول يمشى يقوم يمشى

لأول مره مش هجرى يطول عمر الرئيس لمجرد انى بلقى مكان يساع رجليا فى الاوتوبيس

خلاص هحلم براحتى وحلمى من المرض يشفا وامد رجلى فى قلب الشتا تدفا

لا يوجعنى جفاء بردوا ولا يكفنى فى مطروا

ولا يفرق هواه الساقع واشوف وش الوطن فى بسمة الطفل اللى نايم فى حما الشارع

وديه فرصه و مش راجعه فياللا نعوز ما كانش يجوز تنجح شلة الميدان

ولا الفوران ولا الصرخه اللى مدفونه بقالها زمان نلاقيها كما الادان

وشاب جبان يقوم من النوم بفعل السحر يطلق جرئته كالبحر فتمحو كل ما قد كان

ومش علشان انا مش فاهم الموقف هبطل اروح على الميدان

لان هناك بحس بروح غريبة طاغية على الكل بتاع الفل

بينظم اشارة المرور وحده و مش وحده مصر على خلوده هناك وحده

يرجع حق دمعة ام زنقوها ما بين تأبين و بين تعويض ده لو كان القمر بيبيض

ما كانت رضيت ولا هديت وهذا الرفض كرساله لكل من كانوا بهذه الحرب و تراجعوا

لكل اللى عدم نص الحياة على الارض سلب ام الشهيد حالة كانت منحاها بس تعيش

خناقة كل يوم الصبح ويا الواد علشان ينزل يجيب العيش

وكام بنوته ليها حبيب وكان حالف لا هيسيبها ولا يخونها ويستشهد فتحبس روحها فى الدبله اللى في يمينها

وتحرمها قصيدة شعر كتبها اول امبارح فتحرمنا ابتسامتها

فيتكسف الربيع يجي والصبح يخجل من طلوعه والفقير يشبع بجوعه و البكا يدبح دموعه

رأفةً بيها

وطن محافظش على بسمة البنت هيحرم من وجودها عليه من غناها من حبها للورد

ولما فى يوم يعود الحق وينور اذا رجع النهار من الشرق وخادنا حق كل شهيد اذا حصل المنا ممكن ممكن تقبل الام العذى

تعيش ممكن بحبة ذكريات الامس وجايز برضه تلك البنت جايز تبتسم للشمس

جميع الحقوق محفوظة مدونة مزيكا وبس http://www.mazikawbas.com/2012/04/blog-post_7481.html#ixzz2Hxdjs1tI

انت البدايه الجديدة

ولقيته فجأه بيتصل بيقولى:حد ينام يابنى فى اول يوم فى السنه الجديده ..المفروض تقوم تبتدى بدايه جديده وتنوى ان السنادى تكون احسن...
ليه بقى لازم فى بدايه كل سنه اقول انى هبتدى بدايه جديده؟؟ منا ممكن ابتدى يوم 3/7 مثلا ولا البدايه الجديده مش هترضى؟ 
احنا رابطين السعاده والبدايات الجديده بالأعياد وعشان كده بنفضل تعساء باقى السنه..العيد مش هيجى وهيجيبلك الفرحه معاه انت اللى لازم تدور على السعاده ولازم تكون من جواك..
ومش بدايه السنه الجديده هى اللى هتخليك احسن..انت اللى لازم تحسن من نفسك كل يوم وتطور نفسك يوم بعد يوم..اوعى تفتكر انك لو بتعمل حاجات وحشه كتير ومستنى السنه الجديده تيجى عشان تبطلها هتقدر تبطلها مره واحد..هتقعد يومين ملتزم وبعدين بـــــخ 
لازم تبطل الحاجات اللى مضيقاك بالتمرين ولازم تعود نفسك على الالتزام وكل ده مش هيحصل مره واحده عشان خاطر عيون راس السنه..
ابدأ من اللحظه اللى انت فيها وكل يوم اتقدم حتى لو بخطوه صغيره..هى دى السعاده اللى بجد لما كل يوم تشوف انك احسن من اللى قبله وفى نهايه السنه هتلاقى نفسك انسان تانى احسن بكتير

متستناش المناسبات هى اللى تصنع منك شخص كويس لأن ده مش هيحصل..قوم وإبتدى تغير من نفسك 

اوعى تستسلم للواقع

كل ما تيجى تفكر فى حاجه 
جديده ومفيده الناس كلها تغلطك 
وتقولك امشى على اللى موجود..فى المدرسه لو حاولت تفكر فى حل سؤال يقولك حل بالطريقه اللى محطوطه او هتسقط..فى الكليه نفس الحكايه وفى الشغل تقولهم انا هعملى شغلى بالطريقه اللى تريحنى وهتكون احسن واسرع يقولك اعمل بالطريقه الموجوده او هتترفد من الشغل..كل ما تحاول تفكر يقتلوا التفكير والأبداع 
كل ما تحاول تخرج بره المألوف يحاربوك عشان متبقاش احسن منهم,الناس بتخاف من كل جديد وبتخاف حد يكون احسن منهم حتى لو اقرب الناس ليك..وكلهم شايفين انهم احسن منك وبيفكروا فى اذا كان هم مقدروش يعملوا كده وهم احسن منك يبقى انت هتقدر؟
اوعى فى يوم تكون زى الحصان ده وتقتنع انك متقدرش تعمل حاجه افضل حارب وحاول لحد ماتوصل اللى عاوزه..اوعى تخلى حد يقولك انت تقدر تعمل ايه ومتقدرش تعمل ايه لانه عاجز وهيخليك عاجز زيه.حتى لو طل الطرق اتقفلت فى وشك قبل كده حاول تانى وتالت ورابع وهو انت عايش ليه اصلا؟عشان تحاول وتنجح...
بيقولك لازم تقتنع بالأمر الواقع ولازم تشتغل فى الوظيفه عشان انت مش هتقدر تفتح شركة ليك وتنجحها ولازم تعمل ولازم تسوى عشان هو ده الأمر الواقع..ملعون أبو الواقع 
ماهو لو اتكلمنا بواقعيه بئا يبقى احنا كده كده هنموت وهنسيب الدنيا دى يبقى ليه نتعب فيها اصلا ونحاول نعيش يبقى الاحسن نقعد مأنتخين لحد ما نموت..ربنا خلقنا عشان نعمر الأرض ونبتكر ونبدع وننجح مش عشان نسلم للأمر الواقع 
طول ما انت مع ربنا يبقى احذف كلمه مستحيل من قاموس حياتك و احلم بأى حاجه واصعب حاجه وحاول تحقق حلمك وافضل حاول لحد ما تموت على الاقل هتموت وانت حاسس انك مقصرتش فى حاجه..
كلمه اخيره..اللى بيحب النجاح وبيتعب عشان يوصله يبقى اكيد هيوصل لان ربنا مش هيسيبه 


انا رايح اغير الواقع حد جاى معايا؟؟